নাজমুল ইসলাম মকবুল এর সিলেটী গীতিকবিতা ছেংও উজাইন ব্যাঙও উজাইন

ছেংও উজাইন ব্যাঙও উজাইন

নাজমুল ইসলাম মকবুল

ছেংও উজাইন ব্যাঙও উজাইন

খইয়া পুটি তাইনও উজাইন

ছেঙরলগে ব্যাঙেও দেয় ফাল

আইছেরে ভাই আজব কলির কাল।

আগরআমলো ধনি অইতে লাগতো বহুত বছর

অনকু কিলা ধনি অইযাইন করিয়া ঘছর মছর

আলাদিনর ছেরাগ আইছে বুঝা যায়না তাল।।

আগরআমলো গিরছমানর আছিল বড়ো মান

খেতরধান বেছতা যারা আছিল বেশ সম্মান

অনকু তারার উঘার খালি অবস্থা বেহাল।।

বস্তার ছাউল হখলে খাইরা থাকে পাওডার মারা

মাছো থাকে ফরমালিন ফল সবজিত ওষুধ মারা

নাজমুলে কইন হজাগ অউকা রইবোনা আকাল।।